Matematikaren irakaskuntzan, ikasleen aurrean kontzeptu abstraktuak bistaratzea da erronka handienetako bat. Ez gara gutxitan saiatu ikasleei azaltzen zer den apotema bat edo nola kalkulatzen den prisma baten bolumena, arkatza eta orri bat erabiliz. Zailtasun horri erantzuteko, Irudi geometrikoen simulagailua sortu dut, ikasle zein irakasleentzat pentsatutako web-aplikazio interaktibo bat.
Tresna horrek 2D eta 3Dko irudi geometriko ugari modu dinamikoan esploratzeko aukera ematen du. Erabiltzaileak zirkulu, karratu, piramide edo esfera bat aukeratu eta berehala ikus dezake hiru dimentsioko espazioan. Baina horrez gain, aplikazioa interaktiboa da, erabiltzailea parte hartzaile bihurtuz.
Zer eskaintzen du simulagailuak?
Erabiltzaileak forma bakoitzaren funtsezko parametroak (aldea, erradioa, altuera…) alda ditzake eta, aldaketa bakoitzarekin, irudia denbora errealean eguneratuko da. Horrek aukera ematen du “zer gertatuko litzateke…?” motako galderak egiteko ikasleen aurrean. Adibidez, zer gertatzen da zilindro baten erradioa bikoizten badugu baina altuera bere horretan uzten badugu? Nola eragiten dio horrek bolumenari?
Aldi berean, aplikazioak automatikoki kalkulatzen ditu perimetroa, azalera eta bolumena, erabilitako formulak erakutsiz. Horrela, ikasleek zuzenean ikus dezakete teoria matematikoaren eta emaitza bisualaren arteko lotura. Pentagono eta hexagonoen kasuan, apotema bezalako elementuak grafikoki adierazten dira, ulermena errazteko.
Nola erabili eskoletan?
Tresna baliabide didaktiko egokia izan daiteke Lehen eta Bigarren Hezkuntzako ikasgeletan. Irakasleek arbel digitalean proiektatu dezakete kontzeptu geometrikoak modu bisual eta parte-hartzailean azaltzeko. Ikasleek, berriz, modu autonomoan esperimentatu dezakete, kontzeptu matematikoak modu intuitiboagoan barneratuz eta ikasketa prozesua jolas bihurtuz.
Simulagailua guztiz doakoa da eta ez du instalaziorik behar. Zure nabigatzailetik zuzenean erabil dezakezu ondorengo estekan:
berezuma.github.io/irudigeometrikoak
On egin!